admin2023 
ملياردير… يعرض شراء نادي الزمالك وحل الأزمة المادية
أنا راجل ميسَّر ماديًا…
الحمد لله، والفلوس عندي لا تُحصى ولا تُعد.
ملايين مالهاش حد… وتعبت من كتر العد.
أنا جاهز أشتري نادي الزمالك… وأبقى أنا المالك.
حا أسدد كل ديونه… واللعيبة بالطبع
حا أراضيهم ومحدش حا ينام زعلان.
من جنيه إلى مية… قصدي المليون.
وبفكر والله جديًا… نمد النادي ونضم مسرح البالون.
حا نشتري أراضي جديدة… وكمان لبس جديد.
الفانلة بدل بخطين… راح تبقى تلاتة.
اللعيبة حا نشتري لاعيبة في مستوى كابتنا حسن شحاتة.
يا زمالك ما يكونشي عندك فكر… الفلوس والله كتير.
بقولك ما بقدرشي أعد…
بالفعل ما بعرفشي أهزر،
بتكلم جد.
إيه يعني زيزو مشي وساب النادي… راح أجبلك أحسن منه الواد عبد الهادي.
واد لعيب وشويط من الجون للجون… عليه رجل ولا إيد الهون.
وأيه يعني إمام عاشور؟
الواد زلطة أحسن مية مرة وكمان مشهور.
لعب في خمس أندية… في كفر أبو طشت.
مبسوط من عيلة بتضحك كتير… الفلوس عنده مالهاش حد.
زيي تمام… والله ما تتعد.
وطبعًا حا نصرف لكل لعيب بدل الشوز اتنين… واللاعيبة كلهم من غير أستثني حا تتشال في العين.
مفيش لعيب أحسن من التاني… مصروف إيده يوميًا خمسين جنيه وكيس سوداني.
أنا قلت يعني يتسلى…
وينسى أيام الفقر الله لا يعودها من تاني.
بس الحساب راح يبقى عسير… أنا عايز دوري وكاس.
وتكون عيننا مليانة… ما نبصش لفلوس الناس.
طلباتكم كلها مجابة…
أما أوده، ألبس أنا اللي بنفسي حا أتبعها.
ولو لاحظت عوج… بنفسي برده اللي حا أبيعها.
دلع وهزار عندي مفيش…
أجتهد حا تاخد حقك وعليه بقشيش.
جماهيرنا حا تكتر وتزيد…
وحا تغني: يا أبيض يا أبو ٣ خطوط.
الكل فرحان مبسوط.
مدربين برده راح أجيب…
مستورد أنا ما أحبوش.
الوطني مفيش أحسن منه… عينه مليانة وحالبسه طربوش.
أيوه عشان الحسد، وطربوش يبقى بخطين.
أنا عاوز أفرح جماهيرنا… تغنيله: مدربنا يا أبو طربوش، غيرك ما نحبوش.
جماهيرنا لازم برده نبسطها… كل اللي حا يدخل المباراة راح ياخد من نص جنيه لجنيه.
وأرجوكم ما بحبش حد يقول ليه… دي فلوسي وربنا موسعها، وده شيء
اتربيت أنا عليه.
مليون مبروك عليكم يا زمالك… ربنا عوض صبركم خير.
أثبتولي إنكم رجالة بجد،
ويا أهلي كده مفيش حد أحسن من حد.
الزمالك راجع وبجد.