العالم الآن 
الكاتب الصحفى / إسلام حويلة
من شوية شركة مصر حلوان اوتوموتيف وكيل علامة دونج فينج في مصر اعلنت عن اعتزامها طرح عربية جديدة الاسبوع المقبل في السوق المصري، مش بس جديدة لأ دي كمان نازلة هايبريد(Hybrid)، وتقدر تقول انها تاني عربية هايبريد صيني بعد جيلي اوكافانجو تنزل مصر ، ونشكر تويوتا انها قدمت كورولا هايبرد في السوق.
العربية اسمه HUGE من فئة الـSUV ، وسعرها مليون و575 الف جنيه ، وده سعر بالنسبة لأسعار اليومين دول كويس جدا جدا ، لأنها تمتلك ميزة توفير البنزين ، العربية كعادة الهايبريد مزودة بمحرك بنزين سعة 1.5 تيربو ، استهلاكه للبنزين 4.8 لتر لكل 100 كيلومتر حسب مواصفات موقع الشركة الصينية، يعني ممكن تمشي مسافة 1000 كيلومتر بـ”تفويلة واحدة بس”. وابعادها 4720 – 1910 – 1702 مم (طول – عرض – ارتفاع).
العربية بتتميز بتصميمها الحديث (حاجة مفتخرة كده) واجمالى قوتها 241 حصانًا وعزم540 نيوتن. متر ، وتم اطلاقها في الصين سبتمبر 2022 والسوق المصري يعتبر ثاني الاسواق في المنطقة اللي استقبل العربية بعد السوق الاردني
في اعتقادي ان منظومة الهايبريد أفضل من منظومة الكهربا في مصر، وحتلاقي اقبال أفضل ، خاصة بعد ارتفاع أسعار عربيات البنزين ، وده انا قلته قبل كده لما كتبت عن منظومة نيسان الـe power، لأن التحول الكامل للكهربا بيقلق العميل ، فكرة انك تتحول لتكنولوجيا لسة مش مفهومة بشكل كامل في مصر، اغلب الوكلاء مجابوهاش، غير لمّا يبقى عندك هايبريد، حتة كهربا مع البنزين اللي انت متعود عليه وفاهمه والناس فاهماه، وكمان معندكش مشاكل خاصة بالشحن ، وان البطارية تخلص واي مشاكل من النوع ده.
بالمناسبة.. المهندس احمد العبد أصبح رئيس قطاع السيارات بشركة مصر حلوان ، ويبدو ان فكرة طرح عربيات هايبريد بتقول انه عنده افكار كتير حنشوفها الفترة الجاية