المترو كله.. كل واحد ماسك موبايله..
محدش بيكلم حد.. ومحدش باصص للي جنبه..
كل واحد في دنيا لوحده.. سكوت تام.. كأننا راكبين مترو أشباح!
وفجأة..
صوت طفل صغير بيعيط.. عياط جامد أوي..
كل الموبايلات نزلت مرة واحدة!
كل الناس رفعت راسها..
الست اللي جنبي قالت: “فين العيل ده؟ حد يشوفه حرام!”
والراجل اللي واقف قال: “تلاقيه تايه!”
كله بص يمين.. بص شمال.. مفيش حاجة!! لكن العياط شغال.. شغال ومش بيقف..
لحد ما بصيت قدامي خدت بالي من حاجة غريبة ..فيه راجل قاعد في المقعد اللي قصادي ..حاطط إيديه الاتنين على استاند المقعد.. ومقرب بقه من الحديدة..
وعمال يقلد صوت طفل بيعيط بالظبط.. كأنه طفل حقيقي!
الناس اتصدمت.. فيه اللي ضحك.. وفيه اللي اتعصب وقاله: “انت خضيتنا!”.. والراجل اللي قاعد جنب اللي بيقلد صوت العيل إلى بيعيط قام مخضوض..
تعرفوا الراجل اللي بيقلد صوت العيل إللي بيعيط رد قال إيه؟
قال: “ما انتوا طول الطريق كل واحد ماسك موبايله ومحدش بيكلم حد.. قولت أفوقكم شوية!”
عدسة موبايلي نقلت الموقف بدون روتوش!!
https://www.facebook.com/reel/1920883458926997
