د. أسامة بيومي يكتب : مسرحية البرلمان .. ماتينيه يوميًا لتنفيس غضب الشعب!

بصراحة ظهرت العديد من فيديوهات لبعض أعضاء مجلس النواب، وأنا بسمعها شعرت أني رجعت لأيام الزعيم جمال عبد الناصر!
خطابات رنانة، أصوات جهورية، حماس وانفعال، وعضو واقف يتكلم وكأنه بيخطب في الملايين!
واحد يقول: حكومة مدبولي لازم تتحاسب!
والتاني يقول: لازم يتحاكموا!
والتالت يقول: لازم الحكومة تتغير!
وتسمع الكلام فتحس إنك أمام زعيم الأمة!
وإن النائب ده بيعبر عن كل مصري جواه صرخة من الغلاء وارتفاع الأسعار وضغط المعيشة.
فتقول: خلاص… أهو البرلمان بيتكلم بلسان الشعب!
أهو فيه رقابة…
أهو فيه حساب…
أهو فيه تغيير!
لكن بعد الخطابات الرنانة والأصوات الجهورية والانفعالات…
ولا سحب ثقة بيتم، ولا حكومة بتتحاسب، ولا وزير بيتغير، ولا حاجة بتتغير!
وهنا اكتشفت الحكاية!
البرلمان مش دوره إنه يغير الحكومة رغم أنها من سلطته… البرلمان دوره إنه ينفّس عن غضب الشعب!
فاكرين حلة الضغط؟
قبل ما تنفجر، لازم تفك الفوهة شوية عشان البخار يطلع.
أهو ده بالضبط اللي بيحصل!
الحكومة تزود الضغط…
الأسعار تعلى…
المعيشة تضيق…
المواطن يختنق…
والغضب يتراكم لحد ما حلة الضغط تقرب تنفجر.
وفجأة…
يفتح البرلمان الفوهة!
“الحكومة غلطانة!”
“الوزير لازم يتحاسب!”
“لازم تتغير السياسات!”
“إحنا مع الشعب!”
فيطلع البخار…
هــــوب!
المواطن يسمع الخطاب فيقول:
الله! أهو فيه حد بيتكلم!
الضغط ينزل…
الحلة تهدى…
والمواطن يهدأ…
وبعدها؟
الحكومة تكمل…
وبكده اكتملت المعادلة:
الحكومة ترفع الضغط…
والبرلمان ينفّس الضغط…
والمواطن يدفع ثمن الضغط!
وهنا بقى نفهم عنوان المسرحية:
«مسرحية البرلمان بشارع القصر العيني.. ماتينيه يوميًا لتنفيس غضب الشعب!»
العرض يبدأ بخطابات رنانة…
ثم غضب وانفعال…
ثم اتهامات…
ثم تصفيق…
ثم تنفيس…
ثم ينزل الستار!
وبكرة عرض جديد… بنفس المسرح، ونفس الجمهور، ونفس حلة الضغط!
والسؤال:
هل البرلمان فعلًا صوت الشعب؟
ولا أصبح مجرد فوهة تنفيس للشعب؟
لأن فيه فرق كبير بين برلمان يحاسب الحكومة…
وبرلمان يُشعر المواطن أن الحكومة ستُحاسب!
الأول سلطة ورقابة…
والثاني تنفيس سياسي!
وفي النهاية…
الحلة ما انفجرتش…
بس المواطن هو اللي أستوي !