العالم الآن 
ذكريات الجميل ..فاكرة وأنا فى المدرسة ، كانوا بياخدونا لحصص يعلمونا كيفية التعامل مع الأزمات ، ومنها كيفية التعامل مع الزلازل..معلومة سريعة بس على الماشي
( انا كنت ف مدرسة حكومية )
والحقيقة كانت حصة التعليم لمواجهة الأزمات عملى يعنى فاكرة بعضها والله لحد دلوقتى ومنها .
لو حسيتوا بزلزال اتبعوا الآتى:
بلاش تنزلوا فى الأسانسير..
وانتوا نازلين على السلم بلاش تنزلوا من ناحية الدرابزين لكن انزلوا من ناحية الحيط.
وانتوا نازلين حطوا أيديكم الاتنين فوق رأسكم حفاظا عليكم من اى شئ ممكن يقع عليكم لا قدر الله.
..وانتوا نازلين بلاش التدافع لأن الإنسان ممكن يموت من التدافع مش من الزلزال نفسه.
..لما توصلوا بأمان للشارع بلاش تكونوا جنب مبانى لو فى إمكانية للتجمع فى أماكن فاضية واسعة أفضل..حسمع حد يقول ” قل لن يصيبنا إلا ما كتب الله لنا ” والله كلنا عارفين كده وعارفين ” أينما تكونوا يدرككم الموت ولو كنتم فى بروج مشيدة ”
لكن علينا أن نأخذ بالأسباب الأول .. يعنى أكيد العقل ده مش مخلوق فينا عبث!!
السؤال هنا .. فين دور المدارس بكل أنواعها من التنبيه والتوعية لأن اللى بنتعلمه واحنا صغيرين فعلا مش ممكن ننساه أبدا .
وفين دور إعلامنا بكل أنواعه ..رغم أننى أشيد ببعض الشخصيات كقامة محترمة وقيادات محترمة لكن أين الأخبار فى الاعلام والتحليلات العلمية والتنبؤات بدل الصدمات النفسية اللى كل يوم ناخدها ..وبدل اخبار الناس وخصوصياتها اللى مش شغلانا بحاجة ولا تهمنا
عندك شاشات عالمية بتحاول تنوه وتفسر اللى حصل لعروس البحر المتوسط من أعاصير وأمطار رعدية واحنا أصحاب الظاهرة ولا كأن حصل حاجة وحالة من اللامبالاة الغير مبررة
والكلام فقط اندهاش من تكرار الزلازل وكأننا بنقول زلزال آخر زمن.
مصرية وإسكندرانية وأفتخر.