admin2023 
عريس لُقطة
شباب وعُمري 15… فوق الستين،
سناني طاحت… لكني جامد ومتين.
أكلي فراخ وحمام… وكمان أفضل اللحم الثمين،
وساعات نومي قليلة… يادوب كل 3 أيام ساعتين!
في المشي سريع خالص… أتعب بسرعة،
وهمّا الشبرين!
لعيب كورة سابق وحالي…
لياقة عالية، ما تقولشي لحد!
أهوى الستات… لكن ليّه شروطي،
وبتكلم جد.
عندي فيلا وعربية… وفلوس في البنك مالهاش حد.
وسيم وجميل… وشعر راسي يادوب يتعد،
ودقني بتطلع كل شهرين… أهو كله عَ القد!
شريب قهوة وشاي…
مرة واحدة كل شهرين.
وبرده أنا أهوى الساقع…
هي قزازة كل سنتين!
أمي لسه موجودة… ومتجوز اتنين،
وعيال وخِلْفة مفيش رغبة…
لكني ممكن أفكر كل سنتين!
أجيب لي عيل يسليني…
أشيله في العين.
ليه من الإخوات عشرين…
أنا أصغرهم، وكمان دمي خفيف.
عندي تلفزيون وغسالة… ووابور جاز،
وكمان موبايل هونج كونج… بس بخطين!
عشان كلامي كتير…
مرة كل سنتين!
طالب… والبحث جاري،
عروسة جميلة، شعرها أصفر، وعينها خضراء، وقوامها ممشوق،
تكون أنيقة ورشيقة…
وأكون أنا ليها الزوج المعشوق.
رغي وكلام كتير… أنا ما بحبوش،
عشان كده أنا جايب موبايل واحد لينا إحنا الاتنين… بس بخطين!
هي ليها خط تتكلم فيه في الأسبوع… ساعتين!
أهلها حايكونوا أهلي… لكن كله بحدود،
زيارات لينا مفيش…
بشرط أكون في البيت موجود!
تدخين سجاير أو شيشة…
شيء ما بحبوش،
لكني ماشي على تقاليد أبويا…
أموت في الطربوش!
أنيق في لبسي ولباقتي…
ما لهمشي حدود،
عشان كده بحط شروطي…
وغيره فالباب مسدود!
شروطي وكل احتياجاتي…
بالطبع راح أنزلها على وسائل الاتصالات،
واللي شايف إنها تناسبه…
مرحبًا بكل الستات!
المقابلات للفحص والتأني في الاختيار…
ساعة كل أسبوع.
أيوه ده جواز يا جماعة…
مش لازم أكون مسروع!
لأنه ده حلم حياتي…
وبالنسبة لي أحلى مشروع.
قالوا في التأني السلامة…
ولو حتى أموت من الجوع!
نسيت أقول إني أهلاوي أبا عن جد…
والعروسة، شرطي بالطبع، تكون أهلاوية!
ولو في يوم الأهلي تعثر…
حيكون عليها يوم مش مظبوط،
وبكون في حالة سيئة…
ومش مبسوط.
وحتما عليها لازم تستحملني…
أسبوع ما يفوت!
أنا عريس لُقطة والله…
بس ليّه طقوس!
الصبح فطاري لازم الفول والطعمية،
وراه ضروري كوباية عرقسوس.
أنا كده بصرف كتير…
ما يهمنيش الفلوس!
من جنيه لخمسة…
بس أحس إني مبسوط!